बीड पुन्हा हादरलं: संतोष देशमुख हत्याकांडाची पुनरावृत्ती? दोरीने बांधून अमानुष मारहाण; गंभीर दुखापतीने एकाचा मृत्यू

बीड: शहरात एका दुकानात काम करणार्‍या उमेश दळवी या तरुणाला अमानुष मारहाण करण्यात आल्याचे फोटो सध्या सोशल मीडियावर व्हायरल होत आहेत. हा तरुण बीड शहरातील एका गरीब कुटुंबातील असून,या दलित तरुणाला दोरिने बांधून मारहाण करत त्याचा खून करण्यात आल्याची धक्कादायक घटना घडली आहे. या संदर्भात शिवाजीनगर पोलीस गुन्हा दाखल करण्याची प्रक्रिया सुरू आहे.

धक्कादायक म्हणजे मारहाण होण्यापूर्वी या तरुणाने आपल्या पत्नीला फोन करून, “ मला या ठिकाणी मारणार आहेत” अशी भीती व्यक्त केली होती. तरुण ज्या दुकानात काम करत होता, त्याच ठिकाणी त्याला बेदम मारहाण करून त्याचा जीव घेण्यात आल्याचे आता समोर आले आहे. दरम्यान, मारहाण होण्यापूर्वी रात्री 8:00 वाजता उमेशने आपल्या पत्नीला फोन करून जीवाला धोका असल्याचे सांगितले होते. त्यानंतर रात्री 3 वाजता दुकानदरांनी पत्नीला फोन करून ‘ उमेशची तब्यत बिघडली आहे’ असे सांगत रुग्णालयात नेले, मात्र तोपर्यंत त्याचा मृत्यू झाला होता.

‘ मला मारणार आहेत..., मृत्यूपूर्वी पत्नीला केला होता फोन!

“ माझा पती त्या दारुच्या दुकानावर काम करत होता. रात्री आठच्या सुमारास त्यांनी मला फोन करून सांगितले की, मला इथे मारहाण करणार आहेत. मी घरात लाहन मुलांसह एकटीच होते. या लोकांनी आमची सर्व मालमत्ता काढून घेतली आहे. त्यानंतर रात्री तीन वाजता मला फोन आला की तुमच्या पतीची तब्येत बिघडली असून त्यांना दवाखान्यात दाखल केले आहे. पण प्रत्यक्षात त्यांनी माझ्या पतीचा जीव घेतला आहे. त्यांना अजिबात सोडू नका, कडक शिक्षा करा, ” अशी आर्त हाक मृत उमेशच्या पत्नीने दिली आहे.

या धक्कादायक घटनेची माहिती मिळताच शिवाजीनर पोलिसांनी घटनास्थळी धाव घेत तपास सुरू केला आहे. आरोपींवर खुनासह अ‍ॅट्रॉसिटी कायद्यान्वये गुन्हा दाखल करण्यात आला असून दोरीने बांधून अमानुष मारहाण करत खून केल्याची धक्कादायक घटना समोर आल्यांनतर बीडमध्ये तीव्र संताप व्यक्त होत आहे. याघटनेमुळे काही आडीच वर्षापूर्वी घडलेल्या संतोष देशमुख हत्याकांडाच्या आठवणी ताज्या झाल्या.