मोनालिसा अल्पवयीन असल्याचे सत्य उघड; मुस्लिम पतीवर पोक्सो कायद्यांतर्गत गुन्हा दाखल

महाकुंभ व्हायरल झाल्याने प्रसिद्धिच्या झोतात आलली मोनालिसा पुन्हा एकदा चर्चेत आहे. मोनालिसाच्या लग्नावरुन देशभरात सुरू असलेल्या वादाच्या पार्श्वभूमीवर आता एक मोठे वळण आले आहे. तपासात मोनालिसा अल्पवयीन असल्याचे उघड झाले असून, त्यानंतर तिचा मुस्लिम पती फरमान खान याच्यावर गंभीर कलमाखाली गुन्हा दाखल करण्यात आला आहे.

मिळालेल्या माहितीनुसार, मध्यप्रदेशातील खरगोल जिल्हा पोलिसांनी मोनालिसाचा पती फरमान खान याच्यावर पॉक्सो कायद्यांतर्गत गुन्हा दाखल केला आहे. भारतीय दंड संहितेनुसार गुन्हेगारी कट आणि अवैध विवाहाशी संबंधित कलमेही लावण्यात आली आहेत. तपासात असे उघड झाले आहे की, लग्नाच्या वेळी मोनालिसा 18 पेक्षा कमी वयाची होती. जे कायद्यानुसार गुन्हा मानला जातो. या प्रकरणात अनुसूचित जाती आणि अनुसूचित जमाती (अत्याचार प्रतिबंध) कायद्यांतर्गत कारवाईही करण्यात आली आहे.

राष्ट्रीय अनुसूचित जमाती आयोगाने रुग्णालयाच्या अधिकृत नोंदीच्या आधारे केलेल्या तपासात असे उघड झाले आहे की, मोनालिसाचा जन्म 30 डिसेंबर 2009 रोजी झाला होता. त्यानुसार 11 मार्च 2026 रोजी तिच्या लग्नाच्या वेळी, ती अंदाजे 16 वर्षे,2 महिने आणि 12 दिवसांची होती, जे तिच्या अल्पवयीन असण्याची स्पष्टपणे पुष्टी करते.

दरम्यान, तपासात असेही उघड झाले आहे की, लग्नासाठी बनावट जन्म प्रमाणपत्राचा वापर करण्यात आला होता. हा विवाह केरळमधील एका मंदिरात झाला, जिथे तिच्या आधार कार्डमध्ये दिलेल्या वयाच्या आधारे विधी पार पाडण्यात आले. नंतर ग्रामपंचायतीत नोंदणीसाठी सादर केलेल्या जन्म प्रमाणपत्रात जन्मतारीख 1 जानेवारी 2008 अशी दाखवण्यात आली होती, जी वास्तवीक नोंदीपेक्षा सुमारे दोन वर्षांनी वेगळी आहे. तपास यंत्रणांनी हा दस्तऐवज बनावट असल्याचे घोषित केले असून, विवाह रद्द करण्याचे आदेश दिले आहेत.

दरम्यान, या प्रकरणाला राजकीय वळणही लागत आहे. वकील प्रथम दुबे यांनी आयोगासमोर दावा केला आहे की, केरळमधील काही राजकीय नेते आणि संघटना यात सामील असू शकतात. त्यांनी असाही आरोप केला आहे की, ‘ लव्ह जिहाद’ च्या मुद्यावर एक विशिष्ट मत तयार करण्याच्या प्रयत्नाचा भाग म्हणून हा विवाह केला गेला असावा, तसेच या आरोपांन आरोपांना अद्याप अधिकृतपणे दुजोरा मिळालेला नाही.