शाळा-महाविद्यालयीन विद्यार्थ्यांना एसटीकडून गुड न्यूज

शाळा- महाविद्यालयीन लाखो विद्यार्थी- विद्यार्थीणींना एसटी बसकडून गुड न्यूज देण्यात आली आहे. विद्यार्थ्यांना प्रवासासाठी येणारा अडथळा दूर करण्याच्या उद्देशाने आता विद्यार्थ्यांना शाळा- महाविद्यालयातच एसटीचे पास देण्याचे आदेश महामंडळाचे अध्यक्ष मंत्री प्रताप सरनाईक यांनी दिले आहेत.

मंत्री सरनाईक म्हणाले की, नवीन शैक्षणिक वर्षाच्या पहिल्या सत्रातील शाळा 16 जून पासून सुरू होत आहेत. घरापासून शाळेपर्यंत जाण्यासाठी शासनाने विद्यार्थ्यांना एसटीच्या माध्यमातून 66.66% सवलत दिली आहे. म्हणजे केवळ 33.33% रक्कम भरून विद्यार्थ्यांना मासिक पास काढता येतो.

त्याचप्रमाणे शासनाच्या “ पुण्यश्लोक अहिल्याबाई होळकर” योजने अंतर्गत बारावीपर्यंत शिक्षण घेणार्‍या सर्व विद्यार्थीणींना मोफत एसटी पासचे वितरण केले जाते. यासाठी विद्यार्थी, विद्यार्थीणींना एसटीच्या पास केंद्रावर जाऊन रांगेत उभा राहून पास घ्यावे लागत होते. किंवा गटागटाने आगारात जाऊन आगार व्यवस्थापना कडून पास घेतले जात असत.

शिक्षणासाठी विद्यार्थ्यांना प्रवासाची अडचण लक्षात घेता हा निर्णय घेण्या आला आहे. त्यामुळे आता विद्यार्थ्यांना पाससाठी रांगेत ताटकळत उभे रहावे लागणार नाही.त्यांच्या शाळा- महाविद्यालयांनी पुरवलेल्या यादीनुसार एसटीच्या कर्मचार्‍याकडून त्या विद्यार्थ्यांना आणि विद्यार्थीणींना त्यांचे एसटी पास थेट शाळेत देण्यात येणार आहेत. जेणेकरून त्यांचा शैक्षणिक वेळ वाया जाणार नाही.

या संदर्भात 16 जून पासून एसटी प्रशासनातर्फे “ एसटी पास थेट तुमच्या शाळेत” ही मोहिम राबविण्यात येत आहे. तत्पूर्वी सर्व शाळा महाविद्यालयाच्या मुख्याध्यापक व प्राचार्य यांना एसटीच्या आगार व्यवस्थापकांनी पत्र देऊन आपल्या शाळेत नवीन वर्षात शिकणार्‍या विद्यार्थी, विद्यार्थीणींची यादी तयार ठेवण्यास सांगितले आहे. या अभिनव योजनेचा लाभ राज्यभरात शिक्षण घेणार्‍या लाखो विद्यार्थी, विद्यार्थीणींना होणार असल्याचे प्रतिपादन मंत्री सरनाईक यांनी केले.