दोन्ही मुंडेच हाकेला बीड जिल्ह्यात फिरवून वातावरण दूषित करतायत - दीपक केदार

बीड: ओबीसी महाएल्गारच्या नावाखाली हाकेला बीड जिल्ह्यात जाणीवपूर्वक फिरवले जात असल्याचा आरोप ऑल इंडिया पँथर सेनेचे अध्यक्ष दीपक केदार यांनी केला आहे. हाकेला बीड जिल्ह्यात फिरवून “ दोन्ही मुंडे” बीडचं वातावरण दूषित करत आहेत. येथे दंगल झाल्यास “ दोन्ही मुंडे ” जबाबदार असतील असा इशाराही केदार यांनी दिला आहे.

लोकनेते गोपिनाथ मुंडे सर्व जातींचे लोकनेते होते आजचे मुंडे एका जातीचे नेते झालेत. बीडचा सामाजिक सलोखा पूर्णपणे बिघडलेला आहे. ओबीसी महाएल्गार फक्त बीड जिल्ह्यातच का? महाराष्ट्र म्हणजे बीड आहे का? असे म्हणत केदार यांनी हाकेंच्या ओबीसी महाएल्गार आंदोलनावर प्रश्न उपस्थित केले आहेत. बॅनर फडणे, पुन्हा स्टंट करणे आणि पूर्ण जिल्हा वेठीस धरणे हे योग्य नाही. या सभेतुन व्यवस्थेला नाही तर जातीला टार्गेट केलं जात असून ओबीसी नेत्यांनी सामाजिक वातावरण दूषित करू नये असे आवाहनही दीपक केदार यांनी केले.

दीपक केदार म्हणाले की, बीड जिल्ह्याचे वातावरण दूषित झालेलं आहे, बीड जिल्ह्याचा समाजिक सलोखापूर्ण पणे बिघडलेला आहे. बीड जिल्ह्यांमध्ये दंगल सदृश्य परिस्थिती निर्माण झालेली आहे. हाकेला जाणीपूर्वक फिरवला जात आहे. हाकेला फिरवणारे बीड जिल्ह्यातील दोन्ही मुंडे या सर्व सभेचे आयोजन नियोजन आणि कार्यकर्ते पुरवण्याचे काम करत आहेत. या दोन्ही मुंडे यांनी बीड जिल्ह्याचा सामाजिक सलोखा पूर्णपणे बिघडवून टाकलेला आहे. बॅनरचा इशू क्रिएट करायचा त्याआडून मोठ्या स्टंट करायचा कायदा सव्यवस्था आणि पोलिसांना वेठीस धरायचं.

जर बीड जिल्ह्यात दंगल झाली, तर हाकेला बळ देणारे दोन्ही मुंडे या सर्वाला जबाबदार असतील, असा आमचा आरोप आहे. त्यांनी त्या ट्रॅपमध्ये अडकू नये. बीड जिल्ह्यातील मराठा ओबीसी दलित मुस्लिम यांच्यात विभाजन करू नये आणि पोलिस अधीक्षक यांना सुद्धा आमची मागणी आहे. काही प्रकरण ताजी असताना आता पुन्हा गेवराई मध्ये बॅनरचा इशू क्रिएट झाला आहे. वारंवार कायदा व सुव्यवस्था बिघडवणार्‍या हाकेंना बीडमध्ये येऊ देऊ नये त्यांना हद्दपार करावा अशी मागणी देखील त्यांनी केली आहे.

दोन्ही मुंडेंना देखील आवाहन करताना ते म्हणले अशा पद्धतीने ताकद देणं चुकीचं आहे. तुमच्याकडे बघण्याचा दृष्टीकोन लोकांचा लोकनेते म्हणून आहे. हा दृष्टीकोन तुम्ही जपला पाहिजे. आपण एका जातीचे नेते होऊन काही होणार नाही. लोकसभा विधानसभा अनेक निवडणुका बघितल्या. गोपिनाथ मुंडे यांच्यापासूनच्या निवडणुका पाहिल्या. ते एका जातीपुरते मर्यादित नेते नव्हते लोकनेते गोपीनाथ मुंडे हे सर्व समावेशक आणि सर्व जातींचे नेते होते. याचं भान आजच्या दोन्ही मुंडेंनी ठेवलं पाहिजे असंही केदार म्हणाले.

ओबीसींच्या उपस्थितीमध्ये एका मुंडेंचा सहभाग करून आरएसएसने त्यांना जातीपुरतं मर्यादित ठेवून त्यांचा लोकनेता ही ओळख पसुलेली आहे. लक्ष्मण हाके यांना बळ देणं हे दोन्ही मुंडेंनी थांबवावं, या सभांमध्ये रॅलीमध्येजी भाषणे होतात, ती जातीय तेढ निर्माण करणारी होत आहेत.बीडचे वातावरण दंगलीच्या उंबरठ्यावरती उभं करणारं भाषण होत आहेत. भडकाऊ भाषण होत आहेत. त्यामुळे उद्या बीड पेटलं किंवा दंगल झाली, तर या हाकेंना जे जे बळ देत आहेत, ते सर्व याला जबाबदार असतील. या रॅलीमध्ये संतोष देशमुख यांच्या मारेकर्‍यांना नावाने जर घोषणा दिल्या जात असतील तर ओबीसी आरक्षण वाचवण्याचा आंदोलन आहे की, संताष देशमुख यांच्या मारेकर्‍यांच समर्थन करणारं हे आंदोलन आहे असा प्रश्न उपस्थित होतो आहे.

व्यवस्थेच्या विरोधात कोणीही बोलत नाही केवळ जातीच्या विरोधात बोललं जात आणि म्हणून बीड जिल्हा म्हणजे महाराष्ट्र आहे का? असा प्रश्न उपस्थित होत आहे. कोणत्या जिल्ह्यात तुमची सभा होत नाही दर दोन दिवसाला बीडच्या कोणत्यातरी तालुक्यात सभा होते. बॅनर फाटतो. त्या ठिकाणचे वातावरण दूषित होत, कायदा व्यवस्था वेठीस धरली जाते, बीड जिल्हा म्हणजे महाराष्ट्र नाही ओबीसींचा महाएल्गार म्हणायचं आणि जिल्ह्यातच सभा घ्यायच्या या पाठीमागे काय राजकारण आहे हा प्रश्न देखील आहे. असंही केदार म्हणाले.

हाकेंच्या बॅनरला काळे फासले

बीडच्या गेवारई तालुक्यातील श्रृंगारवाडी फाटा येथे ओबीसी नेते लक्ष्मण हाके यांची उद्या सभा आहे.त्याच पार्श्वभूमिवर अनेक ठिकाणी बॅनरबाजी करण्यात आली आहे. दरम्यान फुलसांगवी फाटा येथे लावण्यात आलेल्या बॅनरवर अज्ञातांकडून काळे फासण्यात आले. त्यामुळे परिसरात काही वेळ तणावाचे वातावरण निर्माण झाले होते. दरम्यान, लक्ष्मण हाके यांच्या समर्थकांनी काळे फासलेल्या बॅनरवर दुग्धभिषेक करून घटनेचा निषेध केला आहे.