आहिल्यानगरमध्ये काँग्रेस जिल्हाध्यक्षांचं अपहरण करुन मारहाण

काँग्रेस आक्रमक दोषींवर कारवारईची मागणी; हिंदुत्ववादी कार्यकर्त्यांवर गंभीर आरोप

अहिल्यानगर: जिल्ह्यातील श्रीरामपूरमध्ये आज सकाळी घडलेल्या धक्कादायक प्रकारामुळे राजकीय वातावरण तापलं आहे. काँग्रेसचे जिल्हाध्यक्ष सचिन गुजर यांचे अपहरण करून मारहाण केल्याची गंभीर घटना समोर आली आहे. पालिका निवडणुकांच्या पार्श्वभूमीवर सुरू असलेला आरोप- प्रत्यारोपाचे प्रकार आता प्रत्यक्ष हिंसाचावर उतरल्याचे चित्र दिसून येत आहे. या घटनेनंतर काँग्रेस आक्रमक झालं असून कार्यकर्त्यांनी आंदोलन करत संताप व्यक्त केला आहे.

याप्रकरणातील दोषींना अटक करून कारवाईची मागणी काँग्रेस कार्यकर्त्यांकडून करण्यात येत आहे. आज सकाळी 7:00 सुमारास सचिन गुजर मॉर्निंग वॉकसाठी घराबाहेर पडले होते. याच वेळी दोन व्यक्तींनी त्यांना जबरदस्तीने गाडी घालून अपहरपण केल्याचा आरोप आहे. काही तासांनंतर त्यांना मारहाण झालेल्या अवस्थेत सोडून दिल्याचं समोर आलं आहे.

संबधित व्यक्ती हिदुत्ववादी संघटनेशी संबंधित असल्याचा आरोप केला जात आहे. अपहरण आणि मारहाण या दोन्ही घटनांचे काही क्षण सीसीटीव्ही कैद झाल्याचे समोर आले आहे. घटनेची माहिती मिळताच आमदार हेमंत ओगले, सचिन गुजर यांचे कुटुंबीय आणि काँग्रेसच्या स्थानिक पदाकिधार्‍यांनी श्रीरामपूर पोलीस ठाण्यात धाव घेतली. घटनाबाबत गुन्हा दाखल करण्याची प्रक्रिया सध्या सुरू आहे.

पालिका निवडणुकीत आरोप-प्रत्यारोपाची मालिका सुरू असताना ही घटना घडल्याने राजकीय वातावरण आणखी चिघळण्याची शक्यता व्यक्त केली जात आहे. निवडणुकीत प्रभाव टाकण्यासाठी विरोधी गटाने हल्ला घडवून आणला, असा आरोप काँग्रसकडून केला जात आहे. पोलिस या प्रकरणाचा पुढील तपास करत असून, सीसीटीव्ही फुटेजच्या आधारे संशयितांची ओळख पटवण्याचे प्रयत्न सुरू आहेत.