इम्रान खानबाबत सस्पेन्स कायम, पाकिस्तानात तणाव!

इम्रान खान यांची जेलमध्ये हत्या करण्यात आली, अशी बातमी गेल्या काही दिवसांपासून समोर येत आहे, दरम्यान आत या प्रकरणात खळबळजनक माहिती समोर आली आहे. त्यामुळे पाकिस्तानात तणावाचं वातावरण आहे.

पाकिस्तानचे माजी पंतप्रधान इमरान खान यांची जेलमध्येच हत्या करण्यात आली असा दावा करण्यात येत होता, या दाव्यामुळे पाकिस्तानमध्ये मोठी खळबळ उडाली आहे. त्यानंतर इमरान खान यांच्या पीटीआय पक्षांच्या कार्यकर्त्यांनी पाकिस्तानात जोरदार आंदोलनाला सुरुवात केली. ज्या जेलमध्ये इमरान खान यांना ठेवण्यात आलं आहे, त्या जेलबाहेर मोठ्या संख्येने पीटीआयचे कार्यकर्ते जमा झाले, अखेर दबाव वाढल्यानंतर जेल प्रशासनाकडून स्पष्टीकरण देण्यात आलं आहे, इमरान खान हे सुरक्षित आहेत, तसेच त्यांना कुठेही दुसरीकडे हलवण्यात आलं नाही. असे जेल प्रशासनाने म्हटलं आहे.

दरम्यान, दुसरीकडे आता इमरान खान यांच्या पक्षाकडून गंभीर आरोप करण्यात आले आहेत. इमरान खान यांना अदियाला जेलमध्ये ठेवण्यात आलं आहे, तिथे इमरान खान यांचा प्रचंड छळ करण्यात येत आहे. इमरान खान यांना सर्वांपासून दूर एका कोठडीत ठेवण्यात आलं आहे. त्यांना आपल्या कुठल्याही कुटुंबातील व्यक्तीला भेटू दिलं जात नाही, इमरान खान यांच्या वकिलाला देखील त्यांना भेटू दिलं जात नाही. इमरान खान यांची बहिण गेल्या काही दिवसांपासून त्यांच्या भेटीचा प्रयत्न करत आहे, मात्र तिची देखील भेट झालेली नाही. असा आरोप पीटीआयकडून करण्यात आला आहे.

दरम्यान, आता पीटीआयचे नेते आणि कार्यकर्ते अधिक आक्रमक बनले आहेत. खैबर पख्तूनख्वामध्ये पीटीआयची सत्ता आहे. खैबर पख्तूनख्वाचे मुख्यमंत्री सोहेल अफरीदी यांनी आता थेट इमरान खान असलेल्या जेलसमोर जाऊन धरणे आंदोलनाला सुरुवात केली आहे. त्यामुळे आता वातावरण आणखी तपाण्याची शक्यता आहे. दुसरीकडे इमरान खान यांच्या बहिणीने देखील एका वृत्तवाहिनीशी बोलताना गंभीर आरोप केले आहेत. इमरान खान यांना जेलमध्ये काही तरी दगा फटका होऊ शकतो असा संशय त्यांच्या बहिणीने व्यक्त केला आहे. मात्र, इमरान खान हे जेलमध्ये सुरक्षित असल्याचा दावा पाकिस्तानच्या सरकारकडून करण्यात आला आहे.