बिहारचे मुख्यमंत्री नितीश कुमार यांचे संतापजनक कृत्य भर कार्यक्रमात महिलेचा हिजाब ओढला , व्हिडीओ व्हायरल विरोधी पक्षांकडून जोरदार टीका

पटणा: बिहारमध्ये नुकत्याच पार पडलेल्या विधानसभा निवडणुकीत महागठबंधनला अभूतपूर्व यश मिळाले. निवडणूक जिंकल्यानंतर आता संयुक्त जनता दलाचे नितीश कुमार पुन्हा एकदा मुख्यमंत्रिपदाच्या खर्चीवर विराजमान झाले. त्यांची सध्या भाजपसोबत युती आहे. बिहारच्या मुख्यमंत्रिपदावर बसलेले नितीश कुमार हे नेहमीच चर्चेत असतात. अनेकदा त्यांची काही विधानं चांगलीच वादग्रस्त ठरतात. तर कधी-कधी त्यांनी केलेल्या एखाद्या कृतीचीही तेवढीच चर्चा होत आहे. सध्या मात्र नितीश कुमारच्या एका कृत्यावर संताप व्यक्त केला जात आहे. बिहारमधील विरोधकांनी नितीश कुमार यांच्यावर टीकेची झोड उठवली आहे. त्यांनी एका मुस्लीम महिला डॉक्टरने लावलेला हिजाब स्वत:च्या हातांनी काढला आहे.

मिळालेल्या माहितीनुसार नितीश कुमार यांनी सोमवारी (दि.15 डिसेंबर) एकून 1283 आयुष डॉक्टरांना नियुक्तीपत्र दिले. त्यासाठी एक विशेष कार्यक्रम आयोजित करण्यात आला होता. या कार्यक्रमात नितीश कुमार यांनी काही डॉक्टरांना मंचावर बोलवून नियुक्तीपत्र सोपवले. यामध्ये नुसरत परवीन या मुस्लीम महिला डॉक्टरांचाही समावेश होता. नितीश कुमार यांनी याच महिला डॉक्टरचा हिजाब हातांनी ओढला आहे. या घटनेचा व्हिडीओ सध्या सगळीकडेच व्हायरल होत असून नितीश कुमार यांच्यावर टीका केली जात आहे.

दरम्यान, कार्यक्रमात डॉक्टर नुसरत परवीन नियुक्तीपत्र घेण्यासाठी मंचावर गेल्या. त्यानंतर नितीश कुमार यांनी नियुक्तीपत्र देण्याआधी परवीन यांना तुम्ही डोक्यावर काय लावले आहे, असे विचारले. या प्रश्नाचे उत्तर म्हणून परवीन यांनी हा हिजाब आहे, असे सांगितले. त्यानंतर नितीश कुमार यांनी नियुक्तीपत्र देण्याआधी आपल्या हातांनी नुसरत परवीन यांच्या चेहर्‍यावरील हिजाब स्वत:च्या हातांनी ओढला. त्यानंतर परवीन यांचा चेहरा दिसायला लागला. हा सर्व प्रकार पाहून परवीन थोड्याशा गोंधळल्या. तर तिथे उपस्थितांमध्ये हशा पिकला. परवीन यांचा हिजाब ओढल्यानंतर नितीश कुमार यांनी त्यांना नियुक्तीपत्र दिल्याचे व्हिडीओमध्ये स्पष्ट दिसत आहे.