शनिवार वाड्यात नमाज पठणाचा व्हिडिओ व्हायरल

पुण्यात नवा वाद, गोमुत्र शिंपुन शुद्धीकरण; खासदार मेधा कुलकर्णी आक्रमक, पुन्हा असले प्रकार...

पुण्यातल्या शनिवार वाड्यात नमाज पठणाचा व्हिडीओ सोशल मिडियावर व्हायरल झाला आहे. यानंतर शनिवार वाड्यात जाऊन पतित पावन संघटनेने आंदोलन केलं आहे. तसंच सदर जागा गोमूत्र शिंपडून पवित्र केल्याचेही सांगण्यात येत आहे. भाजप खासदार मेधा कुलकर्णी यांनी हा व्हिडीओ पोस्ट केला आहे. तसंच यापुढे असले प्रकार आम्ही काहीही झालं तरीही खपवून घेणार नाही असंही मेधा कुलकर्णी यांनी म्हटलं आहे.

पुण्याचे वैभव- शनिवारवाडा ऐतिहासिक वारसा स्थळ की गैर हिंदू प्रार्थना स्थळ? सारसबाग येथे झालेल्या नमाज पठणाच्या घटनेनंतर शनिवार वाड्यात घडलेला प्रकार हा प्रत्येक पुणेकरांसाठी चिंतेचा आणि संतापाचा विषय! पुणे प्रशासन नक्की करते काय? आपल्या वारसा स्थळांचा सन्मान कुठे हरवतोय? चला, आपण सर्वजण एकत्र येऊ आणि शिव वंदना करून आपल्या संस्कृतीचा सन्मान जपूया! अशी पोस्ट लिहून मेधा कुलकर्णी यांनी आंदोलनस्थळी जाऊन सदर कृतीचा निषेध केला आहे.

शनिवार वाड्यात जिथे आम्ही आलो आहोत याच ठिकाणी नमाज पठण करण्यात आलं. त्या जागेचं शुद्धीकरण आम्ही शिववंदना करून करणार आहोत.

हिंदू शक्ती या ठिकाणी एकवटली आहे. आपण पुढच्या काळातही अशीच आंदोलनं केली पाहिजेत. शिनवार वाडा हे ऐतिहासिक ठिकाण आहे. मराठा साम्राज्याचा विस्तार अटक ते कटक जो झाला तो ज्या केंद्रातून चालवला गेला ते ऐतिहासिक ठिकाण हे आमच्या विजयाचं प्रतीक आहे. मुघलांचा नाश या ठिकाणी झाला. तेच इथं येऊन नमाज पठण करत असतील तर आमचं त्यांना आवाहन आहे. तुम्ही ज्या नाईलाजास्तव हिंदू धर्म सोडून धर्मांतर केलं आहे तुम्ही पुन्हा हिंदू धर्मात परत या. त्याच धर्मात राहायचं असेल तर तुमच्या घरी किंवा मशिदीत नामज पठण करा. सार्वजनिक ठिकाणी किंवा ऐतिहासिक ठिकाणी येऊन नमाज पठण करू नका. कायदा सुव्यवस्थेचा प्रश्न निर्माण हाईल असं वागू नका. यापूढे आम्ही खपवून घेणार नाही. पतित पावन संघटना या ठिकाणी शुद्धीकरण करून शिववंदना गाणार आहे. तसंच पूर्वी या ठिकाणी माघी गणेश उत्सव साजरा होत होता तो पुन्हा सुरू करावी अशी मागणी मी करते आहे असंही मेधा कुलकर्णी म्हणाल्या