संभाजी ब्रिगेडच्या गायकवाडांवरील हल्ल्याप्रकरणी सात जणांवर गुन्हा

दोघांना अटक; आरोपी निघाला भाजप पदाधिकारी

संभाजी ब्रिगेड प्रदेशाध्यक्ष प्रवीण गायकवाड यांच्यावर शाईफेक करणार्‍या कार्यकर्त्यांवर गुन्हा दाखल करण्यात आला असून शिवधर्म संघटनेचे आणि भाजप पदाधिकारी इंदापुरातील दिपक काटे, भवानेश्वर शिरगिरे यांच्यासह एकूण 7 जणांवर गुन्हा दाखल झाला आहे. अक्कलकोट शहर उत्तर पोलीस ठाण्यात दिपक काटे आणि त्याच्या 6 सहकार्‍यांवर गुन्हा दाखल झाला असून त्यापैकी दोघांना ताब्यात घेण्यात आल्याची माहिती आहे. बी.एन एस कलम 115 (2), 189 (2), 191 (2) 190, 324 (4) या कलमांन्वये गुन्हा दाखल करण्यात आला. जमाव जमवून मारहाण करणे, गाडीचे काच फोडणे आणि शाई फेक केल्याप्रकरणी हा गुन्हा दाखल आहे. यात एकून 2 आरोपी अटकेत असून उर्वरित 5 आरोपीचा शोध सुरू असल्याची पोलिसांची माहिती आहे.

प्रवीण गायकवाड यांच्यावरील हल्ल्याप्रकरणी दिपक काटे, किरण साळुंखे, भैय्या ढाणे, भवानेश्वर बबन शिरगिरे राहणार इंदापूर आणि कृष्णा क्षिरसागर, अक्षय चव्हाण, बाबु बिहारी राहणार बारामती अशी गुन्हा दाखल करण्यात आलेल्यांची नावे आहेत. फिर्यादीत नमूद केल्यानुसार, अक्कलकोट शहरातील कमलाराजे चौक येथील प्रियदर्शनी हॉल येथे फत्तेसिंह शिक्षण संस्था अक्कलकोट व सकल मराठा समाज अक्कलकोट यांचे संयुक्त विद्यमानाने जन्मेजय राजे भोसले यांचा नागरी सत्कार समारंभ आयोजित कार्यक्रमाकरीता यातील फिर्यादी सोबत संभाजी ब्रिगेड सामाजिक संस्था पुणे प्रदेश अध्यक्ष प्रविण गायकवाड व कार्यकर्ते गाडीतून उतरुन हॉलकडे पायी चालत जात असताना त्यांच्यावर काळे वंगण फेकून हल्ला करण्यात आला.

संभाजी ब्रिगेड सामाजिक संस्था या नावाच्या पुढे श्री छत्रपती हे नाव लावावे या कारणावरुन शिवधर्म फाऊंडेशनचे अध्यक्ष दीपक काटेसह त्यांच्या इतर 6 समर्थकांनी गैरकायद्याची मंडळी जमवून प्रविण गायकवाड व फिर्यादीचे अंगावर शाई वंगण टाकूण छत्रपती संभाजी महाराज की जय अशा मोठमोठ्याने घोषणा दिल्या. तसेच, यावेळी सर्वांना धक्काबुक्की करुन हाताने मारहान केली, इनोव्हा गाडीच्या समोरच्या काचेवर दगड मारून नुकसान केले म्हणून हा गुन्हा दाखल करण्यात आल्याचं फिर्यादीत म्हटलं आहे. याप्रकरणी सहाय्यक पोलिस निरिक्षक बागवान तपास करत आहेत.

कोण आहे दिपक काटे

संभाजी ब्रिगेडचे प्रदेशाध्यक्ष प्रवीण गायकवाड यांच्यावर शाई फेक करणारा दीपक काटे भाजप पदाधिकारी आहे. दीपक काटे हा भाजप युवा मोर्चाचा प्रदेश सचिव असल्याची माहिती असून दीपक काटे याच्या फेसबुक अकाऊंटवर देखील भाजप पदाधिकारी असल्याचा उल्लेख पाहायला मिळतो. तर भाजपचा गमजा घालेला दीपक काटे याचा फोटो देखील समोर आला आहे. विशेष म्हणजे, दीपक काटे याच्यावर काही दिवसांपूर्वी पुणे विमानतळ येथे पिस्तुल बाळगल्याप्रकरणी गुन्हा दाखल करण्यात आला होता.