सोलापूरात पडळकरांच्या कार्यकर्त्याचे फिल्मी स्टाईल अपहरण, मारहाण !

जुन्या वादातून शरद पवार यांच्या कार्यकर्त्याचे कृत्य; पोलिसांनी 6 जणांना केली अटक

सोलापूर: सोलापूरमध्ये आमदार गोपिचंद पडळकर यांच्या कार्यकर्त्याचे फिल्मी स्टाईलने अपहरण झाले. अमित सुरवसे याने जुन्या वैमानस्याचा बदला घेण्यासाठी हे अपहरण केले होते. पोलिसांनी वेळीच कारवाई करून कार्यकर्त्यांला वाचवले आणि 6 आरोपींना अटक केली.

सोलापूर शहरात आमदार गोपिचंद पडळकर यांच्या एका कार्यकर्त्याचं फिल्मी स्टाईलने अपहरण झाल्याची धक्कादाय घटना घडली. मात्र, पोलिसांनी तात्काळ केलेल्या कारवाईमुळे अपहरण झालेल्या कार्यकर्त्याचा जीव वाचवण्यात यश आले आहे. याप्रकरणी पोलिसांनी मुख्य आरोपी अमित सुरवसेसह त्याच्या सहा साथीदारांना अटक केली आहे. शरयु हांडे अपहरण झालेल्या कार्यकर्त्याचे नाव आहे. त्याच्यावर सध्या उपचार सुरू आहेत. हे अपहरण जुन्या राजकिय वैमानस्यातून झाल्याचे समोर आले आहे.

दरम्यान, संपूर्ण प्रकरणाची सुरूवात 2021 मध्ये झालेल्या एका घटनेमुळे झाली. आरोपी अमित सुरवसेने आमदार गोपिचंद पडळकर यांच्या गाडीवर दगडफेक केली होती. काही दिवसांपूर्वी याच घटनेचा बदला घेण्यासाठी शरयु हांडे यांनी अमित सुरवसेला मारहाण केली होती. त्याचा व्हिडिओ सोशल मिडियार व्हायरल झाला होता. त्यानंतर दोन्ही गटांनी आपसातील वाद मिटवल्याचे सांगितले जात होते.

मात्र, अमित सुरवसेच्या मनात या मारहाणीचा आणि अपमानाचा राग कायम होता. याच रागातून त्याने शरयू हांडेचे अपहरण करून बदला घेण्याचा कट रचला. यासाठी त्याने पुण्यातून एक गाडी भाड्याने घेतली. त्यानंतर आपल्या मित्रांच्या मदतीने तो सोलापुरात आला. बुधवारी रात्री अमित सुरवसे आणि त्याच्या साथीदार शरयू हांडे यांच्या घराजवळ गेले. यानंतर शरयू हांडे याला घरासमोरून शस्त्राचा धाक दाखवून गाडीत बवसले. त्याचे अपहरण केले. त्यानंतर हत्येच्या उद्देशाने ते त्याला घेऊन कर्नाटकच्या दिशेने निघाले होते.

पण या अपहरणाची महिती मिळताच सोलापूर शहर पोलिसांनी तात्काळ कारवाई करत 4 पथके तयार केली. पोलिसांनी कर्नाटकच्या दिशेने जाणार्‍या सर्व मार्गांवर नाकाबंदी केली. रात्री 10 च्या सुमारास सोलापूर पोलिसांनी कर्नाटकच्या होर्टी गावाजवळ अमित सुरवसे आणि त्याच्या साथीदारांना ताब्यात घेतले. अमित सुरवसे हा राष्ट्रवादीच्या शरद पवार गटाचा समर्थक असल्याची माहिती समोर येत आहे.

यावेळी पोलिसांना शरयू हांडे हा गाडीत गंभीर जखमी अवस्थेत सापडला. पोलिसांनी त्याला तात्काळ उपचरासाठी सोलापूरला आणले. ज्यामुळे त्याचे प्राण वाचले. पोलिसांनी या प्रकरणी मुख्य आरोपी अमित सुरवसेसह एकून 6 जणांना अटक केली. त्यांच्या विरोधात एमआयडीसी पोलीस ठाण्यात हत्तेच्या उद्देशाने अपहरण केल्याचा गुन्हा दाखल करण्यात आला आहे. सध्या पोलिसांकडून याप्रकरणाचा तपास सुरू आहे.

मी स्वत: बारामतीत येतो:

सोलापूर येथील रुग्णालयात उपचार सुरू असलेल्या शरयू हांडे यांची आमदार गोपिचंद पडळकर यांनी आज सकाळी भेट घेवून माध्यमांशी संवाद साधला. यावेळी पडळकर म्हणाले की, मारेकर्‍यांनी व्हिडिओ कॉल केल्याचे हांडे सांगत आहेत. मारेकरी कोणाचा कार्यकर्ता आहे हे सर्वश्रुत आहे. अशा छोट्या कार्यकर्त्यांना काय मारता, दम असेल तर तुम्ही तारीख वार आणि वेळ सांगा तिथं, त्यावेळेस मी स्वत: बारामतीला येतो असे म्हणत पडळकर यांनी आमदार रोहित पवार यांच्यावर निशाना साधला.

एसआयटी स्थापन करा:

मी सध्या राज्याच्या दौर्‍यावर आहे, कालच संभाजीनगर येथे होतो आज अमरावतीत आहे. कालपासून मी फोनवर बोललो नाही, तो म्हणतोय की व्हिडिओ कॉल केला, मी माझ्या घरच्यांशीही कधी व्हिडिओ कॉलवर बोलत नाही. गृहमंत्री तुमचे, यंत्रणाही तुमच्याच यामध्ये एसआयटी स्थापन करा आणि खरं काय ते जनतेसमोर येऊ द्या. पण उगाचच मी सरकारच्या विरोधात सामान्यांची बाजू घेवून बोलतोय म्हणून कसलेही खोटे आरोप करायचे? हे चालणार नाही. उलट मीच या प्रकरणात एसआयटीची मागणी करत असल्याचे रोहित पवार म्हणाले.