लोकलमध्ये महिलांच्या डब्यात पोलिस शिपायाचं अश्लील वर्तन; दारूपिऊन उद्धटपणा, आरेरावी

मिरा भाईंदर आणि वसई-विरार पोलिस आयुक्तालयातील पोलिस शिपायानेच लोकलच्या लेडीज डब्यात दारूच्या नशेत महिलांशी अश्लील चाळे केल्याची संतापजनक घटना समोर आली आहे. याप्रकरणी वसई रोड रेल्वे पोलिसांनी संबंधित पोलिस शिपायाविरुद्ध भारतीय न्याय संहिता 2023 मधील कलम 74 (महिलांच्या मर्यादेचा भंग) आणि कलम 351 (2) (धमकी व जबरदस्ती) अंतर्गत गुन्हा दाखल करत त्याला अटक केली आहे. ही घटना शनिवारी दुपारी बोरिवली -वसई स्लो लोकलमध्ये घडली. या घटनेनंतर महिलेसह काही प्रवाशांनी रेल्वे पोलिस ठाण्यात जाऊन तक्रार दिली होती. या घटनेचा व्हिडिओ देखील समोर आला आहे.

पोलिस शिपाई अमोल किशोर सपकाळे ( पोलिस आयुक्तालय- मिरा भाईंदर, वसई- विरार) हा दारूच्या नशेत खाकी वर्दीतच मिरा रोड स्थानकातून महिलांच्या डब्यात चडल्याचा आरोप आहे. डब्यातील महिलांनी सांगितले की, सपकाळे हा महिला प्रवाशांच्या पाठीवर हाताच्या कोनीने हात मरात होता, आणि सीटवर बसून काही महिलांना तिकीट विचारण्याचा बनाव करत होता. तसेच महिलांकडे घाणेरड्या नजरेने पाहत होता. इतकेच नव्हे तर काही महिलांचे मोबाईल फोन हिसकावून घेतल्याचाही आरोप त्याच्या वर करण्यात आला आहे. या प्रकाराला कंटाळून काही महिलांनी नायगाव स्थानकात त्याला जबरदस्ती उतरवले व स्टेशन मास्तरकडे तक्रार दाखल केली. त्यानंतर स्टेशन मास्तरने वसई रोड रेल्वे पोलिसांनी माहिती दिली. पोलिसांनी त्वरित घटनास्थळी येत अमोल सपकाळेला ताब्यात घेतले आणि वैद्यकिय तपासणीसाठी पाठवले.

महिला प्रवासी अभया अक्ष वेरणेकर यांनी वसई रोड रेल्वे पालिस ठाण्यात तक्रार दिली, त्यानंतर पोलिसांनी योग्य ती करावाई करत आरोपी शिपायाला अटक केली. आरोपीने दारूच्या नशेत महिलांवर अश्लील वर्तनामुळे महिलांच्या सुरक्षेचा गंभीर प्रश्न पुन्हा एकदा ऐरणीवर आला आहे. रेल्वेतील महिला प्रवाशांमध्ये भीतीचे वातावरण असून,“ जर वर्दीतील पोलिसच असे वागत असतील, तर मग सुरक्षा कुणाच्या हवाली?” असा सवाल नागरिकांतून उपस्थित होत आहे.