तोतया आयएएस महिलेचे पाकिस्तान लष्कराशी कनेक्शन?

घराच्या झडतीत सापडला 19 कोटींचा धनादेश, पाकिस्तानातील अफगाण राजदुतासह 11 दुरध्वनी क्रमांकांशी संपर्क

छत्रपती संभाजीनगर: छत्रपती संभाजीनगरमध्ये अटक करण्यात आलेल्या एका तोतया आयएएस महिलेचे थेट पाकिस्तानच्या लष्कराशी कनेक्शन उघड झाल्याने खळबळ उडाली आहे. गेल्या सहा महिन्यांपासून ही महिला आईसह येथील एका पंचतारांकीत हॉटेलमध्ये वास्तव्यास आहे. ती मूळची छत्रपती संभाजीगरची असून तिचे वडील शिक्षक असल्याची आणि एक भाऊ शहरातील हडको भागात राहत असल्याची माहिती समोर आली आहे.

तोतया आयएएस महिला कल्पना त्रिंबराव भागवत हिला 10 दिवसांची वाढीव पोलिस कोठडी सुनावण्यात आली आहे. कल्पना भागवत ही पाकिस्तानच्या अफगाण राजदुतासह इतर 11 दुरध्वनी, मोबाईल क्रमांकांशी दहा महिन्यांपासून संपर्कात होती अशी माहिती आता समोर येत आहे. दरम्यान पोलिस तपासात ही बाब समोर आली असून केंद्रीय गुप्तचर यंत्रणांनी या 11 क्रमांकाचा तपास सुरू केल्याचे वरिष्ठ अधिकार्‍यांनी सांगितले.

तपासातून समोर आलेल्या माहितीनुसार, भागवत हिच्या पडेगाव येथील घराची झाडझडती घेतली असता 19 कोटींचा धनादेश, संशयास्पद प्रमाणपत्रं तसेच परदेशी क्रमांकाशी नियमीत संपर्क होत असल्याचे समोर आले आहे. तिच्या मोबाईलमध्ये पाकिस्तानी लष्करातील अधिकार्‍यांचे क्रमांक, अफगाणी नेटवर्क, तर चॅट हिस्ट्री डिलीट केल्याची प्राथमिक माहिती समोर आली आहे. त्यामुळे ती गुप्तहेर आहे का?, या दृष्टीने तपास करण्यात येत आहे. तिने यापूर्वी दिल्ली, उदयपूर आणि जोधपूरला वारंवार विमान प्रवास केल्याचे उघड झाले आहे.

दरम्यान, तपासामध्ये तिचे अफगाणिस्तानचा नागरिक व भातात व्यवसायिक म्हणून वास्तव्यास असलेल्या मोहम्मद अशरफ खिल याच्यासोबत प्रेमसंबंध असल्याचे समजले. त्यानंतर केंद्रीय गुप्तचर यंत्रणांसोबत दहशवादविरोधी पथकाने तपासात उडी घेतली. बुधवारी कल्पनाच्या पहिल्या पोलिस कोठडीची मुदत संपली. देशविघातक कृत्याचा संशय बळावल्याने पोलिसांनी कल्पना भागवतला बंदोबस्तात न्यायालयात हजर केले.तिच्या पोलिस कोठडीत दहा दिवसांची वाढ झाली. मूळची छत्रपती संभाजीनगरमधील पडेगाव येथील कल्पना भागवत हिच्याकडे आयएएस असल्याचे बनावट लेटरहेड, संशयास्पद प्रमाणपत्र आढळले आहेत. याप्रकरणी दहशतवादविरोधी पथकासह केंद्रीय गुप्तचर यंत्रणाही तपासामध्ये उतरल्या आहेत. डिलीट केलेले चॅट हस्तगत केल्यानंतर आणि तिची कॉल हिस्ट्री हाती लागल्यानंतर या प्रकरणात मोठा उलगडा होण्याची शक्यता आहे.