संगमनेरमध्ये निवडणूक आयोगाने जप्त केलेली एक कोटी रक्कम कोणाची? कंन्स्ट्रक्शन कंपनीची असल्याचे आले समोर

संगमनेर(अहिल्यानगर) : संगमनेर पालिका निवडणुकीच्या पार्श्वभूमीवर शहराच्या प्रवेशद्वारावर आढळलेल्या एक कोटींच्या रोकड प्रकरणाचा मोठा खुलासा झाला आहे. खांडगाव फाटा येथे शनिवारी दुपारी निवडणूक आयोगाच्या सर्वेक्षण पथकाने एका कारमधून तब्बल एक कोटींची रक्कम जप्त केली होती. या घटनेमुळे राजकीय खळबळ उडाली होती.

राज्यात स्थानिक स्वराज्य संस्था निवडणुकीची धामधूम सुरू ओ. नगर परिषद आणि नगरपंचायतीच्या निवडणुकीचा धुराळा उडाला आहे. उमेदवारांनी नामनिर्देशनपत्र दाखल करून काही ठिकाणी प्रचारालाही सुरुवात झाली आहे. तर काही ठिकाणी युती- आघाडीच्या चर्चा सुरू आहेत. निवडणुकांमध्ये आचारसंहितेचे उल्लंघन होऊ नये यासाठी निवडणूक आयोगाकडून दक्षता घेतली जात आहे.

अशातच निवडणूक आयोगाच्या पथकाने खांडगाव फाटा याठिकाणी तपासणीतून एक कोटी रुपयांची रोकड ताब्यात घेतल्याने चर्चांना उधान आले होते. मागील काही महिन्यात संगमनेरचे राजकीय वातावरण चांगलंच तापलं आहे. त्यातच ऐन निवडणुकीच्या धामधुमीत रोख रक्कम सापडल्याने मोठी खळबळ उडाली.

दरम्यान, निवडणुक प्रक्रियेला सुरुवात झालेली असताना एवढी मोठी रक्कम जप्त झाल्याने शहरात चर्चांना उधान आले. यापाठीमागे राजकीय हेतू असण्याची शक्यता, पैसे नेमके कुठे वापरले जाणार होते. आणि याचा निवडणुकीशी काही संबंध आहे का, या सर्व प्रश्नांवरुन वादंग निर्माण झाले. मात्र, तपासात कंपन्यांनी दस्तऐवज सादर केल्यानंतर परिस्थितीत स्पष्टता आली आहे.

तपासात समोर आलेल्या माहितीनुसार, ताब्यात घेतलेली रक्कम अजमेरा आणि अक्षया कंस्ट्रक्शन कंपनीची असल्याचे स्पष्ट झाले आहे. या दोन्ही कंपन्यांनी रकमेेचे बँक व्यवहार आणि संबंधीत दस्तऐवज पोलिसांनी व निवडणूक अधिकार्‍यांनी मागितल्यावर सादर केले आहेत.

प्राथमिक माहितीनुसार, ही रक्कम धाराशिव येथील बँकेतून काढण्यात आली होती. निवडणूक अयोगाच्या पथकाने केलेल्या तपासणीनंतर रात्री उशिरा मोजदाद पूर्ण करून संपूर्ण रक्कम निवडणूक अधिकार्‍यांकडे सुपूर्द केला.

निवडणूक आयोगाकडून सध्या कागदपत्रांची अंतिम पडताळणी सुरू आहे. उपलब्ध पुराव्यांच्या आधारे ही रोकड निवडणुकीतील गैरव्यवहारासाठी वापरण्याचा उद्देश नसल्याचा प्राथमिक अंदाज वर्तवण्यात आला आहे. पडताळणी पूर्ण झाल्यानंतर रक्कम संबंधित कंपनीकडे परत हस्तांतरित करण्यात येणार आहे.